May 9, 2005

爺爺

這幾天，爺爺病重了，像要快走的樣子。

而我，卻沒法回到他身邊。

●

唔好走啊，好唔好？

我唔想以後無咗你啊，丫公。

我好想見你啊，丫公。

我知你好錫我架，俾我見埋你，好唔好，丫公？

我細個嗰陣應承你，大個嗰時會照顧你架，我咩野都無做到，你唔好走啊。

你走左之後，我會唔慣架…

1 Comment »

The URI to TrackBack this entry is: http://autumnus.blogsome.com/2005/05/09/1/trackback/

  1. 之後我黎左去香港，照顧左阿公五日，就係要再番黎澳洲嗰日下奏，阿公走左。

    我冇見到最後一面。

    ●

    我唔知呢 d 係咪叫天意。嗰日四點，我要番屋企攞行李既時候，心入面就好怪。因為我知道，呢次好可能係最後一次見到阿公。但係因為阿公好似仲過到一陣，於是心諗仲可能有機會七月考完試番黎見到阿公。所以，冇十分為意，只係簡單同阿公交代我要走。

    之後響阿爸架車上面，諗吓都係覺得唔使咁趕，不如落機之後唔好番半日學，等夜 d 仲可以見多阿公一陣，於是改左張機票夜晚十二點先走。嗰陣，我響東區走廊上面。

    其實，我係有機會可以見到阿公最後一面既。改左機票之後，我有同阿爸講。嗰陣，心入面有諗過即刻轉頭番探阿公。﹝我阿爸之後都話佢嗰陣都咁諗﹞不過，男人有陣緊係覺得呢 d 婆婆媽媽野好難講出口，於是兩個人都諗冇咁啱既，就繼續番屋企。

    行到大老山隧道既時候，四點半，響醫院既大伯打俾阿爸，但咁啱就收唔到。心入面已經侄左一侄，打番去二伯話阿公已經唔係咁妥。過左一陣，再打俾響醫院既堂姊既時候，阿公已經過左身。

    ●

    之後我有諗過，究竟自己做緊 d 乜。雖然個個都話響之前見過，就已經算最後一面，但係點都過唔到自己嗰關。有時候，冇錯有 d 野係心意，但做唔到緊係覺得差左 d 野，緊係覺得唔開心，好衰。

    一個老人家臨走既時候，應該會好孤單，做兒孫既係應該係隔黎。唔係為形式，而係想同佢一齊，或者分擔到 d 痛苦。當然，咁講好冇科學根據，但人就係咁，有心情既，響嗰陣科學、理性唔可能幫到你。甚至宜家，我都有 d 怪自己。

    Comment by Kwai — June 27, 2005 @ 12:20 am

RSS feed for comments on this post.

Leave a comment

Line and paragraph breaks automatic, e-mail address never displayed, HTML allowed: <a href="" title=""> <abbr title=""> <acronym title=""> <b> <blockquote cite=""> <code> <em> <i> <strike> <strong>